Bei der 70. Editioun vum Ballon d'Or goufe Sportler, Trainer an Ekippen an 10 verschiddene Kategorien ausgezeechent, fënnef bei den Hären a fënnef bei den Dammen. Dobäi kommen nach dräi Zousazkategorien.
De Ballon d'Or gouf zu London am Palladium verginn an d'Zeremonie gouf vum fréiere Welt- an Europameeschter esou wéi Champions-League-Gewënner Thierry Henry an der brittescher Sportmoderatrice Kate Scott geleet. Si hunn op dësem Owend eng Dominanz vum FC Barcelona am Dammeberäich materlieft, esou wéi e PSG, dee bescht Ekipp vum Joer gouf. Déi wichtegst Präisser vum Owend koumen dann natierlech ganz zum Schluss: D'Alexia Putellas an den Harry Kane hunn de Ballon d'Or 2026 iwwerreecht kritt.
Et sollt awer och bei esou enger grousser Zeremonie net alles riicht lafen. Esou goufe virum Ufank vum Evenement zu London scho verschidde Portraite vun Nominéierten ongewollt publizéiert. Dës waren am Viraus fir all déi Nominéiert gemaach ginn, am Fall, datt si gewanne sollten, heescht et vun den Organisateure vum Ballon d'Or. Dës Aktioun soll op kee Fall en Indice iwwer d'Podiumsplaze sinn, déi zu deem Ament nach kengem bekannt waren.
Déi éischt Auszeechnung vum Owend war keng grouss Iwwerraschung. Beschte jonke Spiller gouf nämlech de Lamine Yamal. De spuenesche Weltmeeschter a Spiller vum FC Barcelona huet domadder dësen Titel fir déi drëtte Kéier um Stéck gewonnen. Bei den Damme goung den Titel vun der beschter jonker Spillerin un d'Vicky Lopez, déi e schonn déi lescht Saison gewanne konnt. Och si spillt fir Spuenien an den FC Barcelona.
No de jonke Spiller goung et eriwwer bei d'Trainer. Den Titel fir de beschten Trainer vun enger Dammenekipp goung nees un den FC Barcelona, dat a Persoun vum Pere Romeu. Beim Härentrainer den éischte Präis vum Owend, deen net mam FC Barcelona a Verbindung bruecht gëtt, woubäi mer awer bei Spuenien bleiwen. De Luis de la Fuente, dee mat der spuenescher Nationalekipp de Weltmeeschtertitel gewanne konnt, gouf fir dëse Succès ausgezeechent.
Dono war et un de Männer a Fraen, déi tëscht de Pottoe stinn. An och hei huet sech de roude Fuedem vum Owend bis ewell weider duerchgezunn. D'Spuenierin Cata Coll vum FC Barcelona krut no hirem Trainer an hirer jonker Matspillerin op dësem Owend e Präis, deen drëtten also fir d'Dammenekipp vum FC Barcelona. Bei den Häre goung d'Auszeechnung un de frëschgebakene Weltmeeschter Unai Simon, deen e groussen Undeel un dësem Titel fir säi Land hat. Hie selwer spillt fir Athletic Bilbao an der La Liga.
Déi éischt Auszeechnung, déi net un de Spuenier goung, war de Spezialpräis "Trophée Socrates". Dës ass un de Bukayo Saka vum FC Arsenal gaangen. Domadder gëtt säin soziaalt Engagement nieft dem Terrain gewierdegt. De Saka engagéiert sech fir benodeelegt a krank Kanner.
Nom Spezialpräis goung et du weider mam Programm. Nodeem se beschte jonk Spillerin, beschte Golkipperin a beschten Dammentrainer gewonnen hunn, war et bal z'erwaarden, datt de Präis fir déi beschten Dammenekipp och un den FC Barcelona goung, déi natierlech déi lescht Saison quasi alles gewonnen hunn, wat ee gewanne konnt: Déi dräi grouss Titelen an der spuenescher Liga esou wéi d'Champions League. Bei de Männer geet dëse Präis dann un déi Ekipp, déi den Champions-League-Titel verdeedege konnt. De PSG oder ganz ausgeschwat Paris Saint-Germain dierf sech beschten Ekipp vum Joer nennen.
Dono goufen de beschte Stiermer an déi bescht Stiermerin mat der Gerd-Müller-Auszeechnung geéiert: déi goung un den Harry Kane (73 Goler) vum FC Bayern München an un d'Charlyn Corral (49 Goler), déi fir den CF Pachuca Femenil a Mexiko spillt.
Mat e bësse Retard goung et dunn a Richtung Highlight vun dësem Owend, op deen all d'Spiller, d'Fans a Responsabel gewaart hunn: Wie kritt de Ballon d'Or 2026?
Bei den Damme goung d'Haaptauszeechnung vum Owend un d'Alexia Putellas vu London City. Si gewënnt de Ballon d'Or no 2021 an 2022 eng drëtte Kéier a stellt domadder de Rekord vun der Aitana Bonmati an, déi déi lescht dräi Joer dëse Präis krut. Kuerz drop du war et un den Hären an do gouf een Numm opgeruff, dee schonn eng Kéier op dësem Owend op der Bün stoung. Den englesche Golscorer vum FC Bayern München Harry Kane huet sech den Ballon d'Or 2026 konnte sécheren. Hien ass nom Michael Owen 2001 den éischten Englänner an nom Karl-Heinz Rummenigge 1981 den éischte Spiller vu Bayern, deen dësen Titel nees konnt gewannen.
De kompletten Iwwerbléck vun all de Placéierunge fannt Dir op Ballondor.com.
