Den Newsom kënnt domadder engem Appell vun Amnesty International an anere Mënscherechtsorganisatiounen no, fir virum Enn vu senger Amtszäit en Zeeche géint d'Doudesstrof ze setzen.
A Kalifornien gouf d'Doudesstrof schonn zanter 20 Joer net méi vollzunn, dowéinst gëllt de Schrëtt als symbolesch. D'Entscheedung vum Gavin Newsom ass allerdéngs och e politescht Signal un de President Donald Trump, deen e Verfechter vun der Doudesstrof ass. Den 59 Joer alen Newsom gëllt als méigleche Kandidat fir d'Demokrate bei de Presidentiellen 2028.
An engem Bréif "un all d'Kalifornierinnen a Kalifornier", schreift hien: "Meng Decisioun vun haut kënnt no bal dräi Joerzéngten, an deenen ech als gewielte Mandataire oppe géint staatlech accordéiert Hiriichtunge Positioun bezunn hunn". Hie wier iwwerzeegt, datt eng Gesellschaft ouni "staatlech sanktionéiert Ëmbréngen" méi staark wier. Déi concernéiert Prisonéier hu keng Méiglechkeet fir géint hir Prisongsstrofen an Appell ze goen.
An den USA hat fir d'lescht de Fall vun der Doudeskandidatin Christa Pike fir Diskussioune gesuergt. Déi 50 Joer al Fra hat Enn September zu Nashville am Bundesstaat Tennessee zwou Gëftsprëtzen iwwerlieft - als éischten Häftling an der rezentster US-Geschicht. D'Pike war 1995 wéinst dem Mord un enger Klassekomerodin zum Doud verurteelt ginn.
D'Debatt war tëschenzäitlech nach emol opgeflaamt, nodeems den US-Defenseminister Pete Hegseth annoncéiert hat, d'Exekutioun vum Amokleefer Nidal Hasan duerch en Erschéissungskommando am Dezember live ze iwwerdroen. No schockéierte Reaktiounen an der Ëffentlechkeet huet den US-President Trump d'Diffusiun awer nees ofgesot.
