En Donneschdegowend ass en Automobilist tëscht Ochsenfurt an Oberickelsheim a Bayern an en Trapp vu 15 Schof gerannt. Wéi d'Police vu Würzburg matdeelt, wier et op enger Kräizung zum Accident komm. Sechs Schof wiere beim Accident gestuerwen. Zwee weiderer goufe sou uerg blesséiert, dass si vu Polizisten hu missen erschoss ginn. De Chauffer gouf beim Accident net blesséiert. Et ass nach net gewosst, wiem d'Schof gehéieren a wéi se op d'Strooss komm sinn.
