An der Nuecht op e Freideg goufen der Police zwou Persoune gemellt, déi an engem Buttek am Garer Quartier versicht haten, mat enger geklauter Bankkaart ze bezuelen. Ee vun de Verdächtege konnt kuerz drop vun enger Patrull vun der Police gestoppt ginn. Deen zweete Verdächtegen war ufanks Richtung Avenue de la Liberté gaangen, konnt awer, no enger Sich vun der Police, an der Stroossbuerger Strooss gestoppt ginn.
Wéi d'Persoun duerchsicht gouf, huet d'Police direkt e puer Bankkaarte bei hir entdeckt. Bei Ermëttlunge koum eraus, dass den Auto vum Proprietär vun de Kaarten am Virfeld duerchsicht gi war. D'Kaarte goufe séchergestallt an d'Police huet se dem richtege Besëtzer nees erëm ginn.
D'Ermëttlunge lafen, d'Persoune goufe protokolléiert.
