Wéi d'Police e Mëttwoch an hirem Bulletin mellt, gouf géint 3.30 Auer an der Stengeforter Strooss zu Äischen versicht, e Bancomat ze sprengen. D'Duerf Äischen war dowéinst bis kuerz virun 9:40 Auer fir den Trafic gespaart.
D'Täter sinn éischten Informatiounen no op Scooteren, respektiv Motorrieder an däischterer Faarf ënnerwee. Verdächteg Persoune sollen direkt dem 113 gemellt ginn. Um Mëttwoch Owend sinn d'Brigangen nach net gepëtzt an deemno weider op der Flucht.
D'Claude Zeimetz ass fir RTL op der Plaz an huet mat engem Awunner vun Äischen geschwat, deen e Mëttwoch de Moien duerch d'Explosioun erwächt gouf.
"Ech sinn aus dem Bett gefall. Et huet zwee Mol explodéiert, zwee Mol. Richteg, richteg haart, ech hu geduecht, do ass de Bankomat gesprengt."
D'Sich no de Verdächtegen huet e Mëttwoch de Moie gréisser Repercussiounen op den Trafic an der Géigend gehat, besonnesch op de Schoultrafic. Weder Bus nach Schüler konnte bei den Arrêt, deen direkt nieft dem Bancomat ass, deen e Mëttwoch de Moie gesprengt gouf.
Am Laf vun e Mëttwoch de Moien huet d'Spuerkeess dann an engem Schreiwes confirméiert, datt et sech beim Bancomat, ëm ee vun hire gehandelt huet. Et betount een, datt beim Incident keng Persounen zu Schued komm sinn, an datt d'Autoritéiten eng Enquête lancéiert hunn.
Et ass dëst deen éischte Bancomat fir dëst Joer, dee gesprengt ginn ass. Zejoert haten Onéierlecher direkt véiermol zougeschloen. Zu Käl, Sëll, Uewerpallen a Reisduerf.
