Méi Energie, mat manner Wandmillen, dofir awer méi modernen Anlagen. Dat ass d'Zil, dat de Stroumproduzent Solèr mat sengem Projet an dräi Wandparken am Norden areeche wëll.
Dofir ginn 13 al Millen ofgerappt. Kritiker vun der Wandenergie behaapten dacks, d'Material dat iwwreg bleift, kéint net richteg recycléiert ginn. Dat soll hei awer net de Fall sinn an och d'Awunner schéngen d'Wandmillen an hirer Noperschaft ze akzeptéieren.
E bessert Landschaftsbild a méi Stroum, dee produzéiert gëtt, sinn d'Zil. Déi 13 Anlagen, déi demontéiert ginn, musse just duerch sechs Neier ersat ginn. Et ass ee Projet, dee ronn 30 Milliounen Euro kascht.
D'Aarbechten hunn am Juli am Wandpark zu Esch-Sauer ugefaangen a sollen am éischten Trimester dat anert Joer mat den Anlagen am Park zu Hengescht ofgeschloss ginn.
