Frankräich a Groussbritannien hu fir den 9. November déi éischt Übung vum multinationalen Ukrain-Trupp a Polen annoncéiert. Bei der Übung Koalicja (polnesch fir "Koalitioun") bedeelege sech bis den 22. November ronn 2.800 Zaldoten aus zéng europäesche Länner, wéi Frankräich a Groussbritannien en Dënschdeg de Moien zesummen annoncéiert hunn. D'Übung gëtt, wéi et an der verëffentlechter Erklärung heescht, am Südoste vu Polen ofgehalen.
Dorun deelhuele sollen deemno Zaldoten aus der Belsch, Estland, Däitschland, Frankräich, Litauen, Holland, Polen, Spuenien, Schweden a Groussbritannien. Dobäi solle souwuel Asätz an der Loft, wéi och um Buedem an der polnescher Stad Nowa Deba gemaach ginn, déi ronn 100 Kilometer fort vun der ukrainescher Grenz läit. De gréisste Kontingent mat 1.100 Zaldote gëtt vu Frankräich gestallt, Groussbritannien stellt der 300.
Déi éischt Übung vum Multinationalen Trupp fir d'Ukrain (Multinational Force - Ukraine, MNF-U) wier "e wichtege Meilesteen", huet de franséische Generol Armel Dirou erkläert, deen d'Übung zesumme mam brittesche Generol-Leutnant Tom Bateman leede wäert. Se géif "konkreet ënner Beweis stellen, datt d'MNF-U direkt nom Enn vu Kampfhandlungen asazbereet ass".
Zil vun der Übung wier et, ze testen, wéi séier an effektiv d'MNF-U verluecht kéint ginn, hunn d'Verdeedegungsministèrë vu béide Länner erkläert. D'Übung géif et méiglech maachen, "d'Vitess an d'Effizienz ze testen, mat där eng Rei Natioune Sträitkräfte um Land, um Waasser an an der Loft asetze kënnen, fir d'Ukrain ze ënnerstëtzen, soubal d'Kampfhandlunge fäerdeg sinn", heescht et vum franséische Verdeedegungsministère.
"Dat ass keen hypotheetesche Plang, ma eng reell Sträitmuecht, déi prett ass, der Ukrain ze hëllefen, soubal d'Kämpf eriwwer sinn", gouf de brittesche Verdeedegungsminister Wes Streeting an der brittescher Erklärung zitéiert.
De franséische President Emmanuel Macron, den ukrainesche Staatschef Wolodymyr Selenskyj an de fréiere brittesche Premier Keir Starmer haten Ufank vum Joer bei engem Sommet zu Paräis eng Ofsichtserklärung iwwert e multinationalen Ukrain-Trupp ënnerschriwwen. D'Grondviraussetzung dofir ass een Ofkommes mat Russland iwwert e Waffestëllstand.
