Géigeniwwer der Bildzeitung sot de Maxwell Richter, sengem Papp wier et schonn zanter méi laangem net gutt gaangen, hien hätt deemno Häerzprobleemer gehat. An der Erklärung vu senge Kanner heescht et: "Fir eis ass grad eng Welt stoe bliwwen". Fir vill Fans wier de Ralf Richter Schauspiller, Kultfigur an e Gesiicht gewiescht, dat si wärend ville Joer begleet hätt. Fir seng Kanner wier en awer virun allem e Papp gewiescht. Déi zwee erwuesse Kanner hunn de Fans fir d'Léift an d'Wäertschätzung fir hire Papp an de leschte Jore Merci gesot.
Bekannt gouf de Ralf Richter virun allem duerch de legendäre Kinofilm "Das Boot" vum Realisateur Wolfgang Petersen aus dem Joer 1981, dee weltwäit Succès hat a villen Acteuren zum Duerchbroch verhollef huet. 1999 hat de Richter an der Ruhrpott-Komedie "Bang Boom Bang" de Gangster Kalle Grabowski gespillt an e weidere groussen Erfolleg gefeiert. Deemols, bei der Première vum Film, gouf hie souguer selwer festgeholl a spéider wéinst Kokainhandel zu enger Prisongsstrof verurteelt.
