Am Stater Gronn gouf et e Sonndeg "Natur" emol aneschters z'erliewen! Den Natur-Musée war fir säi Musée-Fest virun d'Dier a säi Labo an an den Haff vun der Abtei Neimënster geplënnert an huet de Leit Bio- a Geodiversitéit op eng méi praktesch Manéier presentéiert. Als Kiischt um Kuch: eng exzeptionell a ganz rar Vue op Neimënster.
De Gros vun de Leit wousst vläicht guer näischt vum Musée senger Aktioun. Guer net uerg fënnt de Chef, selwer ganz begeeschtert vun hirem Fest a Fan vum Kontakt mat de Leit. Hinne wier et extrem wichteg, dës ganz aktuell Themen op eng onkomplizéiert Manéier ze presentéieren, an d'Visiteuren d'Thematik selwer entdecken ze loossen.
Et goung och ëm Geodiversitéit, Fossilien, Gestengs dat ee vläicht zoufälleg opgeraf huet, well et vu ganz fréier zielt. A well eisen Expert sech extra Zäit geholl huet, erzielt hien iwwer d'Déier vu fréier, weist de Kapp vun engem Fësch-Saurier an erkläert, dass deen deck Schanke ronderëm d'Aen hat.
D'Leit kënne mat hire Saache kommen, sief et Steng oder Fossilien, oder esouguer mat engem Stéck vun engem Meteorit, wa se mengen, dass et esou eent wier! Dat wier allerdéngs eng Première hei zu Lëtzebuerg, seet den Direkter vum Naturmusée, de Patrick Michaely. Dat selwecht gëllt iwwregens och fir Insekten, déi engem net kënneg virkommen: am Labo vum Musée ginn déi ënnert d'Lupp geholl.
Den Naturmusée huet an enger Kollaboratioun mat de Muséeë vu Stroossbuerg, Paräis a Bréissel, e Programm mam Numm "Arthropoda" entwéckelt. Hei fënnt een ënnert anerem digitaliséiert Biller vun Zecken, erkläert de Patrick Michaely, Direkter vum Naturmusée:
