Wann net elo schonn da spéitstens an e puer Joer platzt de Findel aus allen Néit. Den nationale Fluchhafen ass ze kleng. 2050 rechent ee mat 10 Millioune Passagéier pro Joer. Et gouf héich Zäit fir e Masterplang fir de Fluchhafen auszebauen. D‘Deputéiert aus der Chamberkommissioun Transport an Infrastruktur kruten dësen en Donneschdegmoie vun der zoustänneger Ministesch Yuriko Backes an de Responsabele vum Operateur lux-Airport presentéiert. D‘Sëtzung gouf am Livestream um Site vun der Chamber iwwerdroen.
Dofir krut een dann och mat, wéi d‘Transportministesch Yuriko Backes den Deputéierten erkläert huet, wat de Masterplang ass, a wat en net ass:
"Fir mech ass de Masterplan e Meilesteen. Bis elo hate mir, wéi gesot, nach näischt esou. Dat heescht, dat heiten ass elo kee fäerdege Bauplang, wou Dir elo eng Foto dovunner huelt a mir an dräi Joer sot: 'Dat ass elo bestëmmt dat.' Dat ass et net. Wéi gesot, hei musse sämtlech Machbarkeetsstudië gemaach ginn. Projete mussen am Detail ausgeschafft ginn. Déi Autorisatiounen, déi da musse kommen, déi missten natierlech all ugefrot ginn. Hei geet et drëms, fir e Planungsdokument ze hunn."
Och wann an enger éischter Phas bis 2028 den Terminal B ënnen hannert dem Haaptgebai ëm sechs nei Gatë vergréissert gëtt, fir den Terminal A z‘entlaaschten, wäert dat Ganzt an Zukunft matenee verschmëlzen, huet de President vu lux-Airport Gilio Fonck präziséiert:
"Den Terminal B, dee gëtt et net méi. Mir wäerten iwwert d'Joren de gesamten Terminal ausbauen. Et ass d'Haaptgebai, dat ongeféier déi duebel Gréisst kritt vun haut, an dass mer da kënnen iwwert d'Pieren, déi no an no gebaut ginn, d'Kapazitéit ausweide bis op iwwer 15 Milliounen. Dat heescht, do wiere mir gutt bis an déi zweet Hallschent vun de 60er Joren."
Den Terminal A gëtt, vu vir gesinn, no lénks ausgebaut. Schonn 2028 gëtt et hei eng zentral a modern Sécherheetskontroll. Mat der éischter Extensioun sollen och schonn den Check-In an den Drop-Off vun de Bagage verbessert ginn. An enger nächster Etapp bis 2032 soll dann e ganz neie System fir den Handling vum Gepäck installéiert ginn.
Um Findel wäerten administrativ Gebaier, al Cargohalen, d'Sportsaviatioun, an dat fréiert Computerland verschwannen, erkläert de Gilio Fonck: "Dat sinn alles Saachen, déi ebe musse réckelen, fir dass mir dat kënnen opraumen."
Den Terrain ass nämlech begrenzt an de Lëtzebuerger Fluchhafen wëll an Zukunft net nëmme quasi duebel esouvill Passagéier traitéieren, mä och weider op Cargo setzen. Den Direkter vu lux-Aiport Alexander Flassak.
"Wir sind einer der wichtegsten Cargo-Flughäfen in Europa und wollen das auch gerne bleiben. Das hat eine enorme Bedeutung auch für das Land, für den Logistik-Secteur und wir müssen sicherstellen, dass wir auch hier wettbewerbsfähig bleiben, und das ist eben mit den alten Cargo-Hallen noch bedingt möglich. Die sind ein bisschen aus der Zeit gefallen, die haben lange Jahre, 24/7 ihren Dienst geleistet. Wir müssen tatsächlich den Cargo-Bereich modernisieren, automatisieren, um wettbewerbsfähig zu bleiben. Wir sehen, dass andere Flughäfen enorm nachlegen."
D'Plaz gëtt och gebraucht fir den Trafic vu Fligeren um Buedem. Den Taxiway gëtt zweespuereg an Zukunft. Mä net nëmmen dat:
"Mir hunn och éischt Etüde gestart, fir eng, wat mer nenne"Contingency-Pist" ze maachen, dat heescht eng Pist, déi kéint an de Gebrauch kommen, wann eis Haaptpist géif ausfalen. Dat ass net esou einfach. Se ka mat Sécherheet net parallell bedriwwe ginn. Dat heescht et ass keng zweet Pist an deem Sënn. Mee et wier en Hëllefsmëttel, deen Ament wou d' Haaptpist géif ausfalen."
Well d‘Passagéierzuelen däitlech zouhuele wäerten, an et jo och ëm de Clienten hire Komfort soll goen, hunn eng ganz Rei Deputéiert sech Suergee wéinst de Parkplazen gemaach. Dat hei d‘Reaktioun vun der Ministesch Backes.
"Ech verstinn Är Suergen, an ech menge mir maachen eis ëmmer Suergen an d'Leit och: Wann ech op de Fluchhafe ginn, wou parken ech? Mee beim Parking L kënnt e Parkhaus hin. Um Terminal selwer wäert dann och nach eng Kéier e Parkhaus hikommen. An da, wannechgelift, komm mir vergiessen net, dass awer den Tram och op de Fluchhafe fiert."
Ganz wichteg fir d'Ministesch Yuriko Backes ass den neien Stockage fir Kerosin, deen 2028 den Approvisionnement vu Sprit soll garantéieren. Déi sechs nei Reservoiren hunn dann eng Kapazitéit vun 30.000 Kubikmeter.
Eng Rei Servicer ginn an de Skypark, dat grousst Gebai riets nieft dem Fluchhafen, ausgelagert. Da kann am Haaptgebai och d‘VIP-Lounge nei gemaach ginn.
An de Findel soll en neien hybride Kontroll-Tower kréien, dee klassesch an digital Aviatioun vereent. Zum Ausbau vum Fluchhafen gehéiert och d‘Moderniséierung vum Salon d‘honneur a vum Business-Zenter.
Bis 2032 wäerten d‘Aarbechten eng Milliard Euro kaschten. De Staat leet 200 Milliounen Euro bäi, d‘Firma lux-Airport investéiert 800 Milliounen Euro.
