De CGDIS mellt eng ganz Rei Accidenter aus de leschte Stonne mat dorënner och schwéier Blesséierten.
E Sonndeg de Moien ass kuerz no 11 Auer ee Motocycliste tëscht Housen an Uewereesbech gefall. Eng Persoun gouf blesséiert.
Beim Accident tëscht Bidscht an dem Schumannseck goufen e Samschdeg den Owend kuerz no 18 Auer zwou Persoune blesséiert, dovunner eng uerg.
Tëscht Iewerleng an Useldeng krut géint 19.30 Auer en Auto e Bam ze paken. Hei goufen dräi Persoune verwonnt, dorënner eng uerg blesséiert Persoun, déi huet missen aus dem Won befreit ginn.
Am Rond-point Wandhaff gouf och eng Persoun schwéier blesséiert an eng weider méi liicht, dat um 1.40 Auer an der Nuecht op e Sonndeg.
Nieft dëse méi uergen Accidenter ass e Cyclist op der Areler Strooss zu Stroossen e Samschdeg am fréien Owend vun engem Auto ugestouss ginn. De CGDIS schreift vun engem liicht Blesséierten.
Bei engem weideren Accident mat 2 Autoen an der Rue des Trevires an der Stad sinn zwee Autoen net laanschtenee komm. Hei gouf eng Persoun verwonnt.
