Wéi d'Police eis op Nofro matdeelt, ass de Brand och um Sonndegmoien nach net geläscht. D'Feier wier "komplizéiert" ze läschen, heescht et. Och wiere Rettungsdéngschter aus Frankräich als Support am Asaz.
Dem CGDIS-Bulletin no brennt e Fléissband. D'Rettungsekippe si mat engem groussen Dispositif op der Plaz, nämlech mat Secouristen aus den Asazzentere vu Suessem-Déifferdeng, Esch, Käerjeng, Péiteng, Diddeleng, Schëffleng, Koler, Tënten an aus der Stad. Donieft sinn awer och méi speziell Asazgruppe sur place, esou zum Beispill de Groupe d’intervention spécialisé contre les risques nucléaires, radiologiques, biologiques et chimiques (GCBRN), de Groupe d'appui technologique opérationnel (GATO) an de Centre de soutien logistique (CSL).
Persoune sinn dem Bulletin no keng zu Schued komm, dat krute mir och op Nofro nach emol confirméiert. Eng eescht Gefor géing och keng bestoen.
