Fir e Sonndeg da besteet vu 15 Auer un eng nei Alerte Jaune, dëst wéinst méiglechem Schnéi. Am Schnëtt, esou den nationale Wiederdéngscht, wäerten am ganze Land tëscht 2 a 4 Zentimeter Schnéi falen. Plazeweis an haaptsächlech op den Éisleker Koppe kënnen awer esouguer 7 Zentimeter Schnéi erofkommen. Et ass awer och net ausgeschloss, datt plazeweis manner oder guer kee Schnéi leie bleift. D’Temperature leien tëscht -4 Grad an der Nuecht a maximal 3 Grad am Dag. Änlech mellt dat och Kachelmann Wetter, déi am Laf vum Nomëtteg dovun ausginn, datt et “3 bis 4 Stonnen” kräftege wäert schneien.
Weider präziséiert Kachelmann, datt de Schnéi am spéiden Owend scho plazeweis a Schnéireen oder Reen iwwergoe kann.
Fir e Méindeg da schwätzt Kachelmann vun “wiesselhaftem” Wieder mat ville Wolleken a wéineg Oplockerungen. Hei ass um Moien nach mat Schaueren ze rechnen, déi am Laf vum Nomëtteg a Schnéireen wäerten iwwergoe respektiv am Éislek esouguer a Schnéi. D’Temperature wäerten net iwwer 5 Grad klammen.
Änlecht Wieder dann och en Dënschdeg, mat Reeschaueren, bei deenen och emol Schnéi dotëscht ka sinn. Hei rechent ee mat maximal 6 Grad. Fir e Mëttwoch gesäit et haut dono aus, wéi wann d’Temperaturen nees op maximal 3 Grad klammen an et bei vereenzelte Reen- a Schnéireenschauere bleift.
