Et dierf net ugefaange gi mat bauen, ier et eng definitiv Decisioun vum Geriicht gëtt. Dat ass d‘Fuerderung vun der Biergerinitiativ Suessem, dem Mouvement écologique an der Sektioun Kordall vun Natur & Ëmwelt am Dossier Käerjenger Contournement.
An engem Schreiwes appelléieren si en Dënschdeg un déi politesch Verantwortlech, op kee Fall wéi geplangt am Hierscht mat den Aarbechte fir d‘Ëmgoungsstrooss unzefänken. Sollt de Projet nämlech vum Geriicht gekippt ginn, hätt ee grousse Schued an der Natur gemaach an onnéideg Steiersuen ausginn.
Weider fuerderen déi dräi Organisatiounen, datt déi ursprénglech Decisioun, fir e Contournement ze bauen an dofir Bësch an Naturschutzgebidder ze zerstéieren, revidéiert gëtt.
