De Versuch, de Buckelwal, deen zanter Woche virun der Ostseeküst vu Mecklenburg-Vorpommern festhänkt, ze retten, ass an der entscheedender Phas. Déi responsabel Privatinitiativ huet e Freideg d’Hoffnung op e glécklecht Enn geäussert, huet awer keng Detailer zum Zäitplang genannt.
De Wal hätt eng “reell Chance”, sot d’Veterinärin, déi de Projet leet. D’Initiativ wëll d’Déier, dat a flaachem Waasser an enger Bucht festhänkt, mat engem System aus Loftkëssen a Schwammpontonen unhiewen a bis an d’Nordsee oder den Atlantik schleefen. Eigentlech soll de Versuch schonn en Donneschdeg ufänken, gouf awer verréckelt. D’Autoritéiten dulden de Plang vun der Initiativ, hannert där de Mediamarkt-Matgrënner Walter Gunz souwéi d’Geschäftsfra Karin Walter-Mommert stinn.
Den Ëmweltminister vu Mecklenburg-Vorpommern, den Till Backhaus, sot e Freideg viru Journalisten, déi decisiv Phas vun der Aktioun virun der Insel Poel hätt ugefaangen. D’Veterinärin huet iwwerdeem betount, datt d’Initiativ “no beschtem Wësse” fir d’Déier handele géing a wéilt kee Leed an d’Längt zéien. Zu den Erfollegschancen huet si sech awer net geäussert. “Mir wënschen eis all dat Bescht - mir wëssen all net, wéi dat ausgeet.”
Timmy gëtt Liewenszeechen
No der Annonce vun engem neie Rettungsversuch waren Daucher e Freideg de Moie bei de Wal geschwommen. Doropshin huet dëse mat heftege Beweegunge reagéiert. Den Timmy huet e puer Mol fest mat senger Schwanzfloss geschloen a sech bal ëm 90 Grad gedréint, wéi am Livestream vun News5 ze gesi war. D’Daucher hu sech doropshin zréckgezunn.
No e puer Minutten huet de Wal sech nees berouegt a louch nees roueg am hëftdéiwe Waasser. No enger gudder Stonn sinn d’Daucher nach emol mat engem Boot bei de Wal gefuer, fir déi naass Dicher op sengem Réck ze tauschen, déi géint d’Sonn schütze sollen. Dat huet sech d’Déier awer gefale gelooss.
Liest dozou och:
