Dem Jay-Z seng Firma "Roc Nation" huet zanter 2020 all Joer d'Stars ausgewielt, déi an der Halbzeit vum Super Bowl optrieden, ma d'Hip-Hop-Gréisst ass nach ni selwer beim Event opgetrueden. "Wou mir fir d'éischt ugefaangen hunn, d'Show mat Roc Nation ze produzéieren, hate mir just eng Demande: datt den Jay-Z selwer eng Kéier optrëtt, wann de Moment sech fir hie richteg uspiert", huet et vum NFL-Commissioner Roger Goodell geheescht. Hie sot hie kéint sech "net méi fir Fans uechter d'Welt freeën, datt si d'Konscht, d'Kreativitéit an de kulturellen Impakt wäerte materliewen, deen hie mat op d'Bün vum Super Bowl bréngt." Et gouf allerdéngs net preziséiert, ob den Jay-Z deen eenzegen Headliner wäert sinn.
Am SoFi-Stadium, wou de 14. Februar de Super Bowl wäert ausgedroe ginn, huet den Jay-Z, dee jo mam Pop-Star Beyonce bestuet ass, eréischt leschte Weekend zwee Concerten do gespillt. Si waren den Héichpunkt vu senger Tour zum 30. Anniversaire vu sengem Album "Reasonable Doubt", fir déi hien ee Joer ënnerwee war.
"Vu "Reasonable Doubt" bis zu der Halbzeit-Show vum Super Bowl, dat hei war eng Rees", sot den Jay-Z, deem säi richtegen Numm Shawn Carter ass. "30 Joer Musek, Aarbecht, a Kultur op der gréisster Bün vun der Welt. Dee Laf hei ass nach ëmmer een Dram, dee Wourecht gouf."
Ee klengen Indice dofir, wéi vill Star-Power den Jay-Z mat an d'Halbzeit-Show kéint bréngen, waren d'Perséinlechkeeten, déi zu Los Angeles mat him op der Bün stoungen: vun John Legend, DJ Khaled, an Dr Dre bis bei de Snoop Dogg.
