Et hat Enn Mee fir vill Opreegung zu Lëtzebuerg gesuergt, wéi bekannt gouf, datt sech 68 Bauerebetriber, déi hir Mëllech nach un d'EKABE liwweren, vun Abrëll d'nächst Joer un eng nei Molkerei siche mussen. Laang war net kloer, ob all d'Membere vun der Genossenschaft Prolek op där selwechter Plaz ënnerkomme géingen, ma en Donneschdeg gouf offiziell annoncéiert, datt eng konkret Offer vun der Luxlait fir eng Zesummenaarbecht iwwer 4 Joer um Dësch läit.
Nodeems och doriwwer spekuléiert gi war, datt d'Prolek-Membere vläicht bei Arla oder Hochwald ënnerkomme kéinten, ass de Choix um Enn awer op d'Luxlait gefall. Dobäi war ee bei der Lëtzebuerger Molkerei am Ufank nach skeptesch, ob een och wierklech ee Marché fir déi zousätzlech Kapazitéiten hätt. Et geet ëmmerhin ëm bis zu 55 Millioune Liter Mëllech d'Joer. Dofir schafft een dann och mat der belscher Molkerei Solarec zesummen, vun där d'Luxlait zanter enger Partie Joren Aktien hält.
De Luxlait-Direkter Gilles Gerard erkläert, wat ee sech vun där Zesummenaarbecht erhofft:
"Solarec a des ambitions de faire des produits à haute valeur ajoutée, c'est ce qu'ils sont en train de faire. Ils font de la poudre, du beurre, la mozzarella, du lait sans lactose bientôt, des beurres plaquettes. Donc moi j'estime que demain un partenaire comme Solarec peut être un partenaire, d'ailleurs on estime que le partenaire est fiable bien évidemment, mais encore plus fiable et pourra rémunérer les agriculteurs Luxlait et les agriculteurs qui vont nous rejoindre Prolek très très bien."
Aus dem Kontrakt, deen RTL virläit, geet awer ervir, datt Solarec "just" bis zu 45 Millioune Liter pro Joer unhuele wäert. Et géing een dowéinst mat Lactalis, also deem franséische Grupp, zu deem ënnert anerem d'EKABE gehéiert, doriwwer verhandelen, datt dëse bis zu 15 Millioune Liter pro Joer unhuele kéint. Déi Gespréicher schéngen dann och positiv ze verlafen, op d'mannst wann een dem Prolek-President Vic Wirtz gleewen dierf:
"Sou wéi mer ëmmer ee gudden Dialog haten an am Respekt matenee geschafft hunn, sou si mer och no där Annonce virugefuer an doropshin hu si hir Responsabilitéit geholl a si hëllefen eis an Zukunft, fir dee Projet mat der Luxlait zustanen ze kréien, hëllefe si eis virun."
Wat de Kontrakt tëscht der Luxlait an de Prolek-Baueren ugeet, sou steet doranner, datt dës keng Membere vun der Molkerei ginn, mee déi nächst 4 Joer als onofhängeg Livreure schaffen. Doduerch hu si keen Urecht op verschidde Virdeeler, wéi zum Beispill eng sougenannt Treueprämie. De Gilles Gerard ënnersträicht, datt et awer d'Zil wier, d'Prolek-Bauere spéider komplett an d'Luxlait ze integréieren. Viraussetzung ass allerdéngs, datt eng Nohaltegkeetsstudie ergëtt, datt eng Zesummenaarbecht iwwert 2031 eraus wirtschaftlech sënnvoll ass.
Och wann et also nëmmen eng Iwwergangsléisung ass, begréisst d'Landwirtschaftsministesch Martine Hansen den Accord trotzdeem. D'Politik wier elo gefuerdert, d'Viraussetzunge ze schafen, fir d'Lëtzebuerger Landwirtschaft och längerfristeg op zolidd Féiss ze stellen.
"Mir brauchen Transformatiounsbetriber hei zu Lëtzebuerg, fir eis Landwirtschaft ofzesécheren. Mir hunn an eisem Agrargesetz een Artikel, deen dat fërdert, mee mir wëssen, datt et mam Stëmme vun esou engem Agrargesetz heiansdo méi laang dauert an dofir hu mir extra deen Artikel elo schonn erausgeholl an ee separat Gesetz gemaach, fir datt mer wierklech déi Betriber, an dat ass net nëmmen an der Mëllechproduktioun, dat ass och an der Fleeschproduktioun, datt mer déi Betriber kënne geziilt ënnerstëtzen, fir datt mer eis Landwirtschaft nohalteg kënnen ofsécheren."
De Landwirtschaftsministère huet dann och eng Etüd lancéiert, fir de Mëllechmarché ze analyséieren an opzeweisen, wou nach Potenzial ass.
Elo hunn d'Prolek-Betriber nach bis de 25. September Zäit, fir de Kontrakt mat der Luxlait ze ënnerschreiwen. Et kéint awer gutt sinn, datt net all d'Baueren dat maachen, RTL-Informatiounen no empfanne verschiddener deen Delai nämlech als ze kuerz.
