Géint 16 Auer koum et e Mëttwoch zum déidlechen Accident op der A3, tëscht der Ausfaart Léiweng an dem Beetebuerger Kräiz a Richtung Frankräich.
Eng Fra, déi virdrun an engem Auto souz, deen eng Pann hat, gouf aus bis ewell onerklärlecher Ursaach vun engem Auto erfaasst. D'Fra, déi aus Frankräich kënnt, ass nach op der Plaz vum Accident gestuerwen.
De Parquet huet de Miess- an Erkennungsdéngscht op d'Plaz geschéckt.
D'Autobunn war nom Accident fir de Verkéier gespaart ginn.
