Wéi d'Police e Méindeg de Mëtteg opmierksam gemaach huet, zirkuléieren den Ament falsch Gewënn-Messagen, wou een dozou verleet gëtt op e Link ze klicken.
D'URL vum Link verréit, dass net de Supermarché hannert dem presuméierte Gewënnspill stécht.
No e puer Froe soll een dann e Gewënn auswielen a muss seng Donnéeën uginn. Spéitstens elo sollt ee skeptesch sinn a sech d'Fro stellen, ob een iwwerhaapt bei engem Gewënnspill matgemaach huet a wien déi perséinlech Infoen herno kritt.
Hutt Dir dee Schratt gemaach an Är Donnéeën duerchginn, gëllt et opzepassen. Am Klenggedréckten uewen op der Säit steet, dass no 6 Deeg automatesch 85 Euro Abonnement ofgebucht ginn.
E Gewënn gesäit anescht aus! Et handelt sech hei deemno definitiv ëm eng Arnaque vun engem oder e puer Onéierlecher.
Sollte Sue vun Ärer Kaart ofgebucht ginn, kënnt Dir bei der Police eng Plainte maachen.
Méi Detailer a Virsiichtsmoossname fënnt een op BEE SECURE. D'Police réit an deem Sënn och, Famill a Bekannter ze warnen.
