Do wou d'A7 an d'B7 beienee kommen, ass et zu enger Frontalkollisioun tëscht 2 Autoe komm. Dobäi goufen 2 Persounen an deem Auto ageklemmt, dee vun der A7 Richtung Norden op d'B7 ënnerwee war. Si hu mussen aus dem Auto erausgeschnidde ginn. De Chauffer an de Bäifuerer goufe schwéier blesséiert.
De Chauffer vum Auto, dee vun der B7 Richtung A7 gefuer ass, gouf och a sengem Auto ageklemmt a gouf mat Blessuren an d'Spidol bruecht.
Nieft den Ambulanze vun Dikrech, Ettelbréck, der Fiels a Lëntgen, grad wéi de Pompjeeë vu Colmer-Bierg, Dikrech, Ettelbréck a Schieren waren och déi 2 Samu’en, aus der Stad a vun Ettelbréck op der Plaz.
D'Autobunn A7 war wärend e puer Stonnen tëscht Ettelbréck a Colmer-Bierg a béid Richtunge fir den Trafic gespaart. De Miess- an Erkennungsdéngscht war op der Plaz. Géint 11.20 Auer ass d'Streck awer nees komplett opgaangen.
