All ze laang hunn déi ronn 20.000 Spectateuren zu Nice net missen op e Gol waarden. An der 11. Minutt war et nämlech d'Kosovare Asllani dat Schweden mat 1:0 a Féierung brénge konnt. No 22 Minutten huet d'Sofia Jakobsson dann nach op 2:0 erhéicht.
Ma d'Ekipp aus England krut sech duerno gefaangen an huet an der 31. Minutt am Numm vum Francesca Kirby verkierzt. Zwou Minutten drop ass den Englännerinnen den 2:2 Ausgläich gelongen, ma de Gol ass per Videoarbitter wéinst engem Handspill zréckgeholl ginn. Nom Säitewiessel huet Schweden mat enger disziplinéierter Aarbecht an der Defense net méi vill zougelooss a séchert sech sou d'Bronzmedaile.
E Sonndeg um 17 Auer gëtt zu Lyon dann nach d'Finall tëscht den USA an Holland gespillt. Bei der Gëlle Fra gëtt et dofir e Public Viewing, bei deem och RTL on Tour mat dobäi ass.
