Am Katastrophegebitt tëscht dem Nepal a China suergt eng Warnung virun enger méiglecher neier Flut fir Onrou. "Mir hunn Informatioune kritt, datt op der tibeetescher Säit en Damm gebrach ass", mellt déi nepaleesesch Police.
Sécherheetspersonal, Secouristen an Awunner an der betraffener Géigend goufen opgefuerdert, opzepassen a sech a Sécherheet ze bréngen. Der Arméi no gouf wéinst der Iwwerschwemmungsgefor och d'Sich no Vermëssten am Nepal gestoppt. Och déi chineesesch Secouristen haten am Tibet hir Sich- a Biergungsaarbechten um Grenzposte Gyirong aus Sécherheetsgrënn virdru schonn ënnerbrach.
E Séi, deen duerch d'Flut e Mëttwoch nei entstane war, hat schonn en Donneschdeg fir Bedenke bei de chineeseschen Autoritéite gesuergt, well sech dora schonn zwou Millioune Kubikmeter Waasser gesammelt haten a weidert Waasser eragefloss war. Wann dësen iwwerlafe géing, kéint duerch d'Waassermassen eng weider Flut ausgeléist ginn. Déi chineesesch Staatstëlee hat allerdéngs gemellt, datt d'Waasser "natierlech ofgefloss" an de Peegel däitlech erofgaange wier. Ob et nom neien Dammbroch zu Schied oder weidere Blesséierten oder Doudesaffer koum, ass bis ewell onkloer.
Nei Satellittebiller weisen iwwerdeem déi ganz Ausmooss vun der Naturkatastroph, och wann et nach eng Zäitchen dauere wäert, bis een de geneeën Iwwerbléck huet. Dem leschte provisoresche Bilan vun e Freideg no si am Nepal 584 Mënschen ëm d'Liewe komm, wéi d'Waassermasse ganz Dierfer zerstéiert hunn. Ënnert den Affer wieren och vill auslännesch Touristen. Dem Roude Kräiz no wiere méi wéi 93.000 Persoune vun der Naturkatastroph betraff.
Donieft ginn iwwer 2.400 Leit weiderhi vermësst. Dem franséischen Ausseministère no wieren dorënner och 4 franséisch Staatsbierger. Iwwerdeems huet Kanada 5 Millioune kanadesch Dollar gespent, fir den Hëllefs- a Rettungsekippen ënnert d'Äerm ze gräifen.
China huet d'Zuel vun den Doudesaffer och no uewe korrigéiert vun 3 op elo 5 Doudesaffer. De chineesesche CCTV mellt iwwerdeem e Freideg, datt déi 499 Awunner a 555 Touristen, déi am Katastrophegebitt festsouzen, a Sécherheet bruecht gi wieren. Wéi eng Nationalitéit déi Leit hunn, gouf net gesot.
Experte siche weider no der geneeër Ursaach vun der Katastroph. Et geet een dovunner aus, datt e Stéck vun engem Gletscher sech geléist huet.
