Bei engem weideren Dronevirfall am Kader vum Ukrain-Krich hunn Nato-Kampfjetten eng Dron iwwer Litauen ofgefaangen. "Eng Dron, déi grad an de litauesche Loftraum agedronge war, gouf vun Nato-Kampffliger ofgeschoss", huet de litauesche President Gitanas Nauseda en Dënschdeg op X. Well Russland ëmmer méi aggressiv géint d'Ukrain géing virgoen, wier esou en Asaz vun Nato-Kampfjets "vun entscheedender Bedeitung" fir d'Regioun, betount den Nauseda nach. D'Dron soll litauesche Medien no aus Belarus komm sinn. Och Polen huet "preventiv" seng Loftverdeedegung aktivéiert.
De litaueschen Ausseminister Kestutis Budrys huet den Alliéierte vun der Nato Merci gesot, datt "hir Presenz dozou bäidréit, eise Loftraum ze schützen an eis Sécherheet ze stäerken". Dat wier "dat bescht Beispill fir d'Unitéit an d'Decisivitéit vun de Partner an der Praxis" an e "klore Message, datt d'Nato opmierksam, engagéiert a bereet ass".
D'Nopeschland Polen huet iwwerdeem de Start vu "Loftasätz" a sengem Loftraum annoncéiert. Grond dofir wieren "d'Aktivitéite vun jet-ugedriwwenen Drone vun der Russescher Federatioun, déi Attacken op ukrainescht Gebitt lancéieren". D'Schrëtt wiere vu "preventiver Natur" a sollen "de Loftraum sécheren a schützen, virun allem a Gebidder, déi u menacéiert Regiounen ugrenzen".
D'baltesch Staaten Litauen, Estland a Lettland gehéieren zu de gréissten Ënnerstëtzer vun der Ukrain. Estland a Lettland hunn ausserdeem jeeweils eng méi wéi 280 Kilometer laang Grenz mat Russland. All dräi Länner hunn am Kader vum Ukrain-Krich ëmmer nees gemellt, datt Dronen an hire Loftraum agedronge waren.
Wéinst engem Dronenalarm zu Vilnius war am Mee eng éischte Kéier zanter dem Ufank vum Ukrain-Krich an der Haaptstad vun engem EU- an Nato-Staat d'Bevëlkerung an d'Regierungsmemberen ugewise ginn, sech a Sécherheet ze bréngen. Kuerz drop konnt awer Entwarnung gi ginn. Zwee Deeg virdru war eréischt eng warscheinlech ukrainesch Dron iwwer Litauen erofgefall.
