Um éischten Dag vun der Liichtathleetik-EM ass d'Patrizia van der Weken an der Finall vun den 100-Meter-Sprint mat 11.10 Sekonnen op déi 6. Plaz gelaf. E Méindeg den Owend kuerz no 22:50 Auer war de Startschoss vun der Finall zu Birmingham gefall, wou sech um Enn d'Brittin Amy Hunt mat engem Chrono vun 11.00 Sekonnen den EM-Titel huele konnt. Hannendrun hunn et d'Polin Ewa Swoboda (11.02 Sekonnen) an d'Belsch Delphine Nkansa (11.06s) op de Podium gepackt.
An der éischter Manche vun den 1/2-Finalle war d'Lëtzebuerger Sprinterin e Méindeg den Owend ëm 21:10 Auer mat engem Chrono vun 11.08 Sekonnen op déi 2. Plaz komm a konnt sech domat direkt fir d'Finall qualifizéieren. Déi éischt Plaz war mat enger Zäit vun 10.99 Sekonne fir d'Favorittin Amy Hunt aus Groussbritannien.
An der zweeter an drëtter Manche vun den 1/2-Finalle konnte sech direkt duerno nach d'Schwäizerin Géraldine di Tizio.Frey, d'Italieenerin Zaynab Dosso, d'Polin Ewa Swoboda an d'Belsch Delphine Nkansa den Ticket fir d'Finall sécheren. Déi zwou séierst rechtlech Zäite koumen allebéid aus der 1. Manche. D'Brittin Dina Asher-Smith mat 11.10 Sekonnen an d'Schwäizerin Salomé Kora mat 11.12 Sekonnen hunn d'Finall da komplettéiert. Iwwergräifend war d'Patrizia van der Weken dee véiertséierste Chrono vun den 1/2-Finalle gelaf.
Wéini d'Vera Bertemes an de Ruben Querinjean op der Liichtahtleetik-EM 2026 am Asaz sinn, fannt Dir hei.
