D’Sich vun der Police wier erfollegräich gewiescht: Den aacht Joer alen Noah wier am spéide Freidegowend gesond a monter erëmfonnt ginn, huet d’Police zu Frankfurt matgedeelt. Hie wier bei senger Mamm gewiescht, déi an engem Appartementshaus zu Heppenheim bei engem Bekannten ënnerkomm wier.
D’Ermëttler hate virdru matgedeelt, datt d’Mamm aktuell kee Suergerecht fir d’Kand hätt. D’Police huet de Jong dowéinst un d’Jugendamt ginn. D’Mamm duerf zeréck Heem, nodeems d’Police hir Demarchen ofgeschloss hat.
Den aacht Joer ale Jong war zanter e Mëttwoch de Moie vermësst ginn. Den Ermëttlungen no war hien ëm 8 Auer mat sengem Schoulsak am Garer Quartier zu Frankfurt ofgesat ginn. Hien ass allerdéngs ni bei senger Schoul ukomm. Doropshin ass eng grouss Sichaktioun nom Kand lassgaangen.
Der Police no ware schonn e Mëttwoch an eng Rei aner bekannt Openthaltsplaze vum Jong ofgesicht ginn. Och Videoopnamen aus der Ëmgéigend vun der Schoul goufen analyséiert. Duerch ee KI-Tool konnten zousätzlech Biller vun dem Jong identifizéiert ginn, déi hie warscheinlech no sengem Verschwanne weisen.
An der Géigend vun der Schoul gouf en Donneschdeg dunn de Schoulsak vum Jong fonnt. Et gouf och e puer Hiweiser aus der Populatioun, déi awer net zu enger konkreter Spuer gefouert hunn. Bei der Sich, déi sech op d’Rhein-Main-Gebitt konzentréiert hat, war och ee Policehelikopter an d’Waasserschutzpolice an den Asaz komm. E Freideg de Moien haten d’Ermëttler du matgedeelt, datt sech an den Ermëttlungen d’Hiweiser op d’Famill vum Jong verhäert hätten.
