Iwwer 40.000 Mënschen hunn hir Haiser misse verloosse wéinst dem Brand, eng weider 45.000 Leit wieren opgeruff ginn, sech op eng méiglech Evakuéierung ze preparéieren, esou déi lokal Autoritéiten.
E Samschdeg war ee Feier ausgebrach, dat sech antëscht op ronn 6.000 Hektar ausgebreet huet. Just nach 8 Kilometer sinn d'Flame vu Reno ewech. An der Regioun liewe méi wéi 280.000 Persounen.
Medieberichter no gouf et bis ewell eng hallef Dose Blesséierter, dorënner och dräi Pompjeeën. Sëllegen Haiser si scho verbrannt. De Gouverneur vun Nevada Joe Lombardo huet fir de Bezierk Washoe, an deem Reno läit, den Noutstand ausgeruff.
Ronn 800 Pompjeeë sinn am Asaz. D'Feier wier vu Mënsche verursaacht ginn, sou d'Asazekippen op der Plaz, genee Detailer goufen an deem Hibléck awer net genannt. D'Ermëttlunge lafen.
