D'Flame sinn am Laf vum Sonndeg ëmmer méi no un d'Stad Villa de Leyva erugeréckelt, wéi de Vertrieder vun de lokalen Autoritéiten, de José Castro, der Noriichtenagence AFP géigeniwwer sot. E Sonndeg am Nomëtteg waren deemno ronn 200 Hektar Land betraff. Am Verglach zum Moien hat d'Feier sech domat scho vervéierfacht.
D'Stad an den Anden ass fir hir Kolonialarchitektur bekannt an zitt all Joer iwwer eng Millioun Touristen un. D'Feier war den Autoritéiten no e Samschdeg an engem Bësch net wäit fort ausgebrach. E Sonndeg am Nomëtteg wier de Brand zu 50 Prozent "ënner Kontroll" gewiescht.
De kolumbianesche President Abelardo de la Espriella huet versprach, d'Regierung géif d'Géigend am Kampf géint d'Flamen ënnerstëtzen. "Mir wäerten all staatlech Ressource mobiliséieren, fir dëst Feier ze bekämpfen an d'Awunner, dat kulturellt Ierwen, genee wéi den natierleche Räichtum ze schützen", sot hien op X.
Beschbränn sinn an der Ande-Regioun net wäit vum Äquator wärend der Dréchent net seelen. Allerdéngs gëtt déi aktuell Dréchent a Kolumbien och duerch de Klimaphänomen El Niño verstäerkt. De jéngsten Donnéeën no ginn et aktuell eng 18 aktiv Bëschbränn.
