"Puppy Yoga has landed in Luxembourg": Mat deem Saz huet eng australesch Entreprise Mëtt Juli hir éischt Yoga-Seancë mat Welpen hei am Land annoncéiert. D'Coursë waren den 1. an 2. August zu Wickreng ouni Autorisation d'Etablissement. An och ouni eng Geneemegung beim Landwirtschaftsministère ze froen a Saachen Déierewuel.
No engem 2. Weekend Puppy Yoga zu Wickreng, wou och ouni Autorisatioun vun der Veterinärsinspektioun geschafft gouf, ass en 3. Rendez-vous an engem Yogastudio zu Bouneweg gestoppt ginn. Yoga mat Déieren – dat geet vu Geessen iwwer Lamae bis bei Kanéngercher a Kazen - ass en Trend, deen ëmmer méi Leit begeeschtert. Eng reegelrecht Euphorie gouf et zwee Weekender zu Wickreng.
Wickreng, de leschte Weekend am September: Kuschel-Zäit, genannt Puppy-, also Welpe-, Yoga. Mini-Mippercher sollen dofir suergen, datt eise Stress manner gëtt a Glécksgefiller am Plaz kommen. Si nenne sech Spëtzereider an Australien, elo si Yoga Paws zu Lëtzebuerg. Et ass e Geschäftsmodell, dee sech an de Soziale Medie formidabel verkeeft. Zu Wickreng waren zweemol véier Puppy-Yoga-Seancen ausverkaaft. D'Begeeschterung war grouss.
D'Welpen stinn am Mëttelpunkt, de Yoga schengt éischter Niewesaach ze sinn. Et soll ee bei den Übunge just um Buedem bleiwen, fir den Hënn net wéi ze doen, zumools wann Ufänger dobäi sinn. Eng speziell Formatioun fir Puppy Yoga Coursen ze ginn, bräicht een net.
Oppasse wéi een déi Kleng ophieft, se net forcéiere bei engem ze bleiwen – all déi Reegelen – en aart-, an altersgerechten Ëmgang wiere garantéiert, gëtt behaapt. An de Muppe géing et super gutt dobäi, erkläert den Ziichter aus Frankräich. Fir hir Sozialiséierung wier genee dat néideg!
D'Lis Stirn, Veterinärin zu Colmar-Bierg, leet hire Veto an: Welpe bräichten onbedéngt Rou a Schlof an et sollt een hir Sozialiséierung lues an doheem maachen. Och se esou jonk am Auto mathuelen, wier schlecht, dacks géif et deene Klengen och iwwel ginn. En anere Problem: ouni fräien Ausgang op eng Wiss zum Beispill géinge se net léieren, wou se dierfe Pippi maachen.
D'Veterinärin kontert also, grad ewéi d'Münchener Uni fir Veterinärsmedezin, déi 2024 schonn Alarm schléit, wat Puppy Yoga ugeet.
Och wa si den Alter hu fir vum Ziichter fort an eng Famill ze kommen, wiere se an enger kritescher Phas an och dann hätte se näischt a Yoga Coursen ze sichen. D'Veterinären iergere sech, dass dobäi mat Qualzuchte wéi Zwergspitze oder englesche Bulldogge geschafft géif ginn. Do géing een de Veterinär quasi matkafen, well déi extreem gesondheetlech Problemer hätten. Mat hinne Reklamm ze maachen, wier deplacéiert.
Den Ziichter aus Frankräich brauch bal zwou Stonne bis op Lëtzebuerg. D'Welpen, geschat net vill méi al wéi 8 Wochen, sinn ouni hir Mamm, sëtze véier Stonnen am Auto a goufe fir zwee Deeg hannerenee gebucht. Pro Dag also och nach véier Stonne schaffen! Esou jonk hätte se wuel kaum eng Tollwut-Impfung, sou d'Veterinärin. Se dierften einfach esou scho guer net iwwer d'Grenz.
D'Veterinärsinspektioun huet keng Autorisatioun fir dës Yoga-Course ginn, well Yoga Paws keng ugefrot hunn, also illegal geschafft hunn. D'Seancen zu Bouneweg, de Weekend no deenen zu Wickreng, goufen no der Interventioun vun den Autoritéiten ofgesot a kuerzerhand op Metz verluecht. Och do hätt eng Geneemegung misse gefrot ginn. Um Internetsite vun der Gesellschaft mat Sëtz zu Olm gëtt den Ament weder zu Lëtzebuerg nach zu Metz Puppy Yoga ugebueden. Italien huet dës Geschäftsiddi iwwregens komplett verbueden. An de meeschten europäesche Länner gëtt recommandéiert, Puppy Yoga net zouzeloossen.
D‘Leit déi un de Puppy Yoga Couren zu Lëtzebuerg deelgeholl hunn an, mat hirem Accord, gefilmt gi sinn, gëllen an den zwee Reportagen als reng Statisten, déi hëllefen, den Oflaf vun dëse Coursen ze weisen. A kengem Fall wëllt RTL heimat undeiten, dass si, als Participanten, vun den net gesetzeskonformen Aktivitéite vu Yoga Paws Sàrl-S woussten oder deenen, duerch hir Präsenz, zougestëmmt hätten.
